تلخيص محور الاخلاق بكالوريا اداب بالدارجة التونسية - فلسفة بكالوريا اداب -

تلخيص محور الاخلاق  بكالوريا آداب بالدارجة التونسية

فلاسفة اتفاهمو اللي فما سعادة في الدنيا اما كل واحد عندو تصور ليها مثلا :

·        ابيقور يتصور اللي السعادة في عملية الحساب العقلي للذات والالام معنتها ابيقور يحبك حسبها كي تلقى لذة وراها الم كبير سيب عليك منها وكي تلقى الم صغير وراه لذة كبيرة اصبر عليه ميسالش , ويقلك فمة 3 انواع لذات :لذات ضرورية وخيرة كالاكل ولذات غير ضرورية وخيرة كالتانق في اللباس و لذات غير ضرورية وغير خيرة كالسياسة ويقلك ركز مع الاولى واعدل مع الثانية وابعث الثالثة

معنتها كي تبدا فمة لذة صغيرة وراها الم

كبير اخطاك منها والعكس هو الباهي.

·        اما ارستيب :فيعتقد انو السعادة في اغتراف اللذات الحاضرة معنتها اي فرصة متع جو تلقاها متفلتهاش وانشالله تخلى ههه

وفما بنثام وميل : بنثام قلك السعادة في تحقيق منفعة معناتها كي تعمل حاجة تجيبلك ربح اذيكا السعادة ياخي اتهموه بالانانية ياخي جاء ميل من بعدو زاد فكرة الامتداد معنتها السعادة كي تحقق المنفعة لاكبر عدد من العباد .

وفما اللي يقولو مفماش سعادة كيما وشوبنهاور اللي يقول قدرنا التعاسة و"حياتنا نسيج من الالم والملل" وفرويد

للي يقول "لم يدخل في خطة الخلق البتة ان يكون الانسان سعيدا"

ملاحظة:

شو موقف شوبنهاور وفرويد مبني على انو الانسان عندو برشا رغبات مينجمش يحققهم مادامو يعيش في مجتمع وحضارة وقوانين اذاكا علاش مفماش سعادة وفما الم وشوبنهاور يفترض اذا كان حققنا رغباتنا الكل تو نقلقو معادش فما حاجة نحبو عليها اذاكا علاش فما ملل والحل عندو الاخلاق الزهدية والفن .

الأخلاق :

كيف كيف ديما الفلاسفة مش متفاهمين على المسائل الكل من بينها الاخلاق فعندك ايمانويل كانط بقول اللي الواجب الأخلاقي والأخلاق تنبع من العقل خاطر هو "اكثر الأشياء توزعا بالعدل بين الناس" وهذا يخلينا نحكيو على كانط اللي يحب على الاخلاق الكونية اللي تشمل العالم الكل وكانط يقلك اللي الفعل ما يتسمى اخلاقي كان ما يكون نابع من الإرادة متاعك الخيرة ويكون دون ارغام ودون اي مصلحة او منفعة ولا يلبي اي ميل ماكانشي ما يتسماش اخلاقي باهي هذا كانط وعندك روسو يقول الواجب الاخلاقي ينبع من الوجدان خاطرو يؤمن ان الناس ملائكة وماعندهمش الشر وعندك دوركهايم يقول اللي الواجب الاخلاقي ينبع من المجتمع خاطر المجتمع يسطرلك اخلاقك وهذا يخليه يقول اللي الاخلاق متعالية على الفرد ومرغمة له وهوما الكل يختلفو في تحديد مصدر الواجب الاخلاقي ويشتركو في فكرة معاييرو ويجي نيتشه في الاخر يقلب بيهم الطاولة ويسالهم هي الاخلاق بكلها شنيا قيمتها شنيا زادت للبشرية قدمتها ولا وخرتها ويجاوب يقول اللي الاخلاق حاجة خايبة وهي اداة تمويه.

وفما حكاية صغيرة ماركس يقول مفماش اخلاق وحدة في البلاد خاطر فما طبقات اذاكا علاش كل طبقة عندها اخلاقها.